गुल्मी जिल्लाको श्रृङ्गा गाविसमा रहेको रुरु एफ.एम (९४.८ मेगाहर्ज) को रेडियो कार्यालयमाथि ०६५ पुस ९ गते राति ९ बजेतिर तीन जनाको समूहमा आएको एक नकाबधारी समूहले आक्रमण गरेको छ । कार्यालयमाथि ढुङ्गामुढा प्रहार गरिरहेको समूहलाई स्थानीयबासी मिलेर नियन्त्रणमा लिन खोज्दा उनीहरु फरार रहेको रेडियो स्रोतले बताएको छ । आक्रमणकारीलाई लखेटेपछि स्थानीयवासीले रातभर रेडियो सुरक्षा गरेका थिए । सदरमुकाम तम्घासबाट प्रहरीको टोली घटनास्थलतर्फ गएको छ । आक्रमणबाट कुनै क्षति नभएको रेडियोका संयोजक युगराज बस्यालले बताए । घटनाको नेपाल पत्रकार महासंघ गुल्मीले भत्र्सना गरेको छ । महासंघका अध्यक्ष जनार्दन घिमिरेद्वारा हस्ताक्षरित विज्ञप्तिमा घटनाका अपराधीहरूको तत्काल खोजी गरी कारबाही गर्न प्रशासनलाई आग्रह गरिएको छ । एफएम तीन महिनाअघि सञ्चालनमा आएको हो ।

Source: INSEC & Kantipur