असार २८ – सेती नदीमा आएको बाढीका कारण २५ घर बिस्थापित भएको छ । बाढीमा फसेका २९ जनालाई मध्यरातमा स्थानीयबासी र प्रहरीले सकुशल उद्धार गरेको छ । मध्य पोखरामा रहेको रामघाटमा २१ र गाईघाटमा ४ घर बिस्थापित भएको हो । नदी थुनिएर रामघाटमा कृत्रिम ताल बनेपछि २१ घर डुबेका हो ।
१४ घरकाले बाढी आउनसाथ सामान सारेर सुरक्षितस्थलतर्फ गएका थिए । तर ७ घरका २९ जना बाढीमा फसेपछि स्थानीय र प्रहरीले राति नै उद्धार गरेको थियो । स्थानीय स्वर्गद्वारी युवा क्लबका युवाले रातिनै फेवातालमा पुगेर डुंगा ल्याएर स्थानीयको उद्धारमा जुटेका थिए । कास्की प्रहरी प्रबक्ता रबिन्द्र पौडेलले बिहान ३ बजेसम्म उद्धार गरिएको बताए । यसैगरी नदी किनारमै रहेका गाईघाटका ४ परिवार पनि बिस्थापित भएको प्रहरीले जनाएको छ । बाढी आउनसाथ स्थानीयबासी भागेकाले मानविय क्षति भने नभएको प्रहरीको भनाई छ ।
सेती नदीमा गत बैशाख २३ गते आएको भिषण बाढीमा ३२ को मृत्यु भएको र ३२ अझै बेपत्ता छन । त्यसयता पटकपटक आएको बाढीले एकदर्जन परिवार विस्थापित भैसकेका थिए ।