बिशाल भट्टराई
गुल्मी, मंसिर ५ । अर्घाखाँचीको धारापानी–९, बाटाकाखाल्टा भन्ने जंगलमा एक पुरुषको कंकाल फेला परेको छ । कंकाल हंसपुर–५ बस्ने ३७ बर्षीय डोरबहादुर थापको रहेको प्रहरीले जनाएको छ । कंकालसंगै भेटिएको नेपाली नागरिकताको प्रमाण पत्र, झोला र जुत्ताका आधारमा कंकालको पहिचान भएको हो । गत असार १ गते संधिखर्कमा भएको एमाओवादीको कार्यक्रममा सहभागी हुन घरबाट हिँडेका थापाको जंगलमा कंकाल भेट्टिएको हो ।
थापाको कंकाल घरबाट झण्डै १८ किलोमिटर टाढा फेला परेकाले घटना सुनियोजित भएको परिवारको अनुमान छ । परिवारले घटनाको सत्य तथ्य पत्ता लगाई दोषीलाई कार्वाही गर्न प्रहरीसँग आग्रह समेत गरेका छन् । कंकाल परीक्षणका लागि जिल्ला अस्पताल सन्धिखर्क लगिएको छ । घटनाबारे अनुसन्धान भईरहेको जिल्ला प्रहरी कार्यालय अर्घाखाँचीले जनाएको छ ।