गुल्मी पर्यटन तथा सांस्कृतिक महोत्सवका उदघाटन गर्न बिहीबार आएका अध्यक्ष दाहालले पत्रकार महासंघ र क्रान्तिकारी पत्रकार संघले आयोजना गरेको पत्रकार सम्मेलनमा अब गृह नपाएकै अवस्थामा पनि माओवादीले सरकार नछोड्ने स्पष्ट पारे । अध्यक्ष दाहालले तत्काल गृह मन्त्रालय नलिए पनि पछि माओवादीलाई नै दिने सहमति भएको जानकारी दिए ।

सात बुँदे सहमति जस्तै पछि गृह नपाएमा माओवादीले के गर्छ भन्ने पत्रकारहरुको जिज्ञासामा अध्यक्ष दाहालले भने, 'माओवादी शान्ति र संविधान निर्माणमा मुख्य जिम्मेवार दल हो, आफैले जन्माएको सरकारलाई जस्तो सुकै परिस्थितिमा पनि साथ दिन्छ ।' उनले माओवादी शान्ति र संविधान निश्कर्षमा पुर्‍याउने उद्देश्यले सरकारमा सहभागी भएको बताए ।

यस अघि महोत्सवको उदघाटन गर्दै अध्यक्ष दाहालले माओवादी सरकारमै रहेका बेला नेपालमा पर्यटन वर्ष मनाउन लागिएको र अहिले पनि पर्यटन मन्त्रालय माओवादीकै भागमा परेको जानकारी दिंदै नेपालमा पर्यटन पुर्वाधारका धेरै सम्भावना रहेकाले यसको विकासमा ध्यान दिन जरुरी रहेको बताए । हेलिकोप्टरबाट सदरमुकाम तम्घास आएका दाहाल पार्टीका तर्फबाट मन्त्री छान्न तयार भएको जानकारी दिंदै बिहीबार साँझ नै राजधानी फर्किएका छन् ।