जिल्ला आयुर्वेदिक स्वास्थ्य केन्द्रमा दरबन्दीअनुसार कर्मचारी नहुँदा नियमित कामकाजमा समस्या परेको छ ।

नेपाल सरकारको दरबन्दीमा रहेका कुल १९ जना कर्मचारीमध्ये अहिले १२ जनामात्र कार्यालयमा उपस्थित रहेकाले अस्पतालको दैनिक काममा निकै समस्या आएको कर्मचारीले गुनासो गरेका छन् । कार्यालय प्रमुखसमेत लामो समयसम्म कार्यालयमा उपस्थित नहुँदा काममा थप समस्या भएको छ ।

प्रायः कार्यालयमा कार्यालय प्रमुख लामो समयसम्म विभागबाट नआउने र आए पनि काजमै घरपायक मिलाएर बस्ने प्रवृत्तिले गर्दा समस्या उब्जिएको कविराज कलराज आचार्यले दुःखेसो पोख्नुभयो ।

सुरुसुरुमा दिनमा फाट्टफुट्ट दुई चारजनामात्र बिरामी आउने गरेको स्वास्थ्य केन्द्रमा अहिले दैनिक ५०देखि १०० जनासम्म बिरामी आउने गरेकाले कर्मचारीको अभावमा थप समस्या परेको उहाँले बताउनुभयो ।