गाउँमा विद्यालय बनाउन दाजुभाईले दिए १७ लाख रुपैंया
Published on
6:05:00 PM //
घनश्याम गौतम
आफुले पढ्न नपाएको पिडाले अन्यलाई शिक्षा दिलाउन थानपतिका दुई दाजुभाईले गाउँमा स्कुल संचालन गर्न १७ लाख रुपैंया भन्दा बढी रकम उपलब्ध गराएका छन् ।
जापान र बुटवलमै व्यवसाय गर्दै आएका थानपति ३ झमादीका ५० वर्षे मेघबहादुर बसेल र उनका भाई मदनले विद्यालयको पूर्वाधार निर्माण, शिक्षक, विद्यालय सामाग्रीका लागि रकम प्रदान गरेका हुन् । उनले विद्यालय संचालन दिगो बनाउन आम्दानीको वार्षिक १० प्रतिशत रकम हरेक वर्ष उपलब्ध गराउने समेत घोषणा गरेका छन् । उनीहरुको मासिक आम्दानी २ लाख ५० हजार रुपैंयाभन्दा बढी छ । आर्थिक अभावकै कारण तिन कक्षा पढ्दै गर्दा रोजगारीका लागि भारत पसेका थिए । भारतमा झण्डै दुई दशक होटलमा काम गरेर जापानको टोकियो शहर पुगेका थिए । टोकियो शहरमा समेत शुरुमा होटलमै काम गरेका बसेल दाजुभाईले अहिले आफ्नै होटल संचालन गरेका छन् ।
जापानबाट गाउँ फर्कदा सानासाना बालबालिका धुलोमा लड्दै र खेल्दै गरेको देखेपछि मेघबहादुरमा सहयोग गरेर बालबालिका पढाउने र चेतना जगाउने दया पलाएको थियो । दुई भाईको सल्लाहमा गाउँमा बाबुआमाको नाम पनि रहने र विद्यालय जानबाट बञ्चित दलित बालबालिकालाई शिक्षा प्रदान गर्ने गरी विद्यालय खोल्ने सोंच बनाएर रकम सहयोग गरेको मेघबहादुरले बताए । ‘व्यक्तिको चेतना माथि नउठेसम्म गाउँ र समाजको विकास नहुने भएकाले विद्यालय निर्माण गर्न सहयोग गरेका हौं ।’, उनले भने ।
दुई दाजुभाई मध्ये मेघबहादुर अहिले बुटवलमै बस्दै आएका छन् । भाई मदनले जापानमै होटल संचालन गरिरहेका छन् । ‘हामीले गरिबीकै कारण पढन नपाएको र दलित भएकै कारण अपहेतिल समेत हुने गरेकाले सहयोग गर्न मन लागेको हो’, दाता मध्येका दाजु मेघबहादुरले भने, ‘विद्यालय नगएका गाउँका बालबालिकालाई पढाउन सके उनीहरु पनि भोली हेपिन नपरोस, र गरेर खान सकुन भन्ने हाम्रो चाहना हो ।’
झमादी गाउँमा प्रेम बिष्णुदेवी सबेल प्राथमिक विद्यालय खोल्ने गरी आइतवार सभाषद प्रदिप ज्ञवालीले भवनको शिलन्यास गरेका छन् । भवनको शिलान्यास गर्दै सभाषद ज्ञवालीले बालबालिकाहरुको शिक्षा दिक्षाको दायित्व राज्यको भएपनि मेघबहादुरका दाजुभाईको सबैका लागि उदाहरणीय भएको बताए । ‘मेघबहादुरजीहरुले आफु अशिक्षित र अपहेलित हुनुको पीडा बिर्सन जुन सहयोग गर्नु भएको छ, त्यसमा तपाईहरुले पूर्ण साथ दिनु जरुरी छ’, उनले भने, ‘विद्यालय बनेपछि भोली गाउ“का सबै बालबालिकालाई विद्यालय पठाउने दायित्व तपाईहरुको हो ।’
![](https://blogger.googleusercontent.com/img/b/R29vZ2xl/AVvXsEilVfUpO2RV3BssH1VmhvpTht-mZ1nc30tXvj5FCTtCFefjl3cJWvywmxaYpY1YUtIV84AiOV0m8K3tafxlkfD8qpdt1hrWepSC1sjBBQye91DNkXRurz854Vj6PUWHiVzMsnxSSJMzKOE/s320/Dhanyabad+didye+Gyawali.jpeg)
‘नजिकको विद्यालय भनेको जमादी प्रावि लामाखर्क हो’, उनले भने, ‘त्यहाँ पुग्न केटाकेटीलाई डेढ घण्टा लाग्ने गर्दछ ।’ धनबहादुर ले अहिले मेघबहादुरबाट प्राप्त भएको १७ लाख रुपैंयामा ४ कोठे भवन निर्माण गरिने र बाँकी रहेको रकम अक्षयकोषको रुपमा राखेर विद्यालय संचालन गरिने बताए । मेघबहादुरले दलित गाउ“मा विद्यालय नै निर्माण गरिदिन थालेपछि अन्य स्थानीय पनि हौसिएका छन् । उनीसंगै आईतवार नै बुटवल बसाई सरेका झमादीकै सुबेदार खुमबहादुर बसेलले १ लाख रुपैंया र स्थानीय सन्तबहादुर बसेलले १० हजार रुपैंया सहयोगको घोषणा गरेका छन् ।
0 प्रतिकृयाहरु