काठमाडौं, चैत्र २५ - नेकपा-माओवादीसहित ३३ दलले आहृवान गरेको नेपाल बन्दले आज देशभरको जनजीवन प्रभावित भएको छ ।

काठमाडौंसहित देशभर यातायात ठप्प भएको छ भने शिक्षण संस्था, उद्योग, कलकारखाना, बजार र पसल खुलेका छैनन् । चोक चोकमा माओवादीसहित साना दलका कार्यकर्ता बाटो ढाकेर बसेका छन् । राजधानीमा बन्दकर्ताले साइकल चलाउनसमेत कडाई गरेका छन् ।

वर्तमान सरकार खारेज गरेर दलहरुकै नेतृत्वमा सहमतिको सरकार गठन गर्नुपर्नेलगायतका माग ती दलहरुको छ । उनीहरुले चार दलीय उच्चस्तरीय राजनीतिक समिति खारेज पनि सर्त बनाएका छन् ।

सरकारविरुद्ध आन्दोलित दलको आजको बन्द पहिलो चरणको अन्तिम कार्यक्रम हो । उनीहरुले १० दिने आन्दोलनको आज समाप्ती गर्दैछन् भने बैठक बसेर नयाँ आन्दोलन घोषणा गर्ने बताइरहेका छन् ।