भवनमा क्षति पुगेका कारण पौदीअमराइको पौदी प्राथमिक विद्यालय, नेटाको तिखेचुली प्रावि, छापहिले गाविसको सिद्ध प्रावि, इश्मादोहोली गाविसको देवीस्थान प्राविलगायतका विद्यालयमा पठनपाठन बन्द भएको हो । पौदी प्राविको ३ कोठे भवन भत्केपछि भवन अभावमा पढाइ अनिश्चितकालका लागि बन्द गरिएको व्यवस्थापन समिति अध्यक्ष चन्द्रबहादुर केसीले बताए ।

विद्यालय बन्द भएपछि तीन सयभन्दा बढी विद्यार्थीको पठनपाठन प्रभावित भएको छ । असारदेखि वर्षे विदा भएका विद्यालयमा बन्दकै बेला पहिरोले क्षति पुर्‍याएपछि खुले लगत्तै पुनः बन्द भएका हुन् । जिल्ला शिक्षा कार्यालयले जिल्लाका दर्जनभन्दा बढी विद्यालयमा पहिरोले क्षति पुर्‍याएको र झन्डै ३ हजार विद्यार्थी प्रभावित भएको जनाएको छ ।

पहिरोका कारण दोहोलीको देवीस्थान प्राविको प्राङ्गण नै बगाइदिएको छ भने जाइकाले निर्माण गरिदिन लागेको २ कोठे भवन पनि जोखिममा परेको छ । मैदान भत्किएर स्कुलको भवनमै पुग्न सक्ने अवस्था नभएपछि निर्माण नहुँदासम्मका लागि विद्यालय बन्द गरिएको शिक्षक हिरा दर्लामीले बताए । विद्यालयमा २ सय ६० विद्यार्थी अध्ययनरत छन् ।