चानचुने होइन, प्रधानमन्त्री पुत्रीलाई ताक्ने एक युवकले जेलमा हावा खानु परेको छ । १२ दिन अघि पक्राउ परेका उनी महानगरीय प्रहरी परिसर काठमाण्डौको हिरासतमा रहेका छन् ।

प्रधानमन्त्री डा बाबुराम भट्टराईकी पुत्री मानुषीलाई पटक पटक प्रेम प्रस्ताव राखेर सताएका पाल्पाका अर्जुनप्रसाद न्यौपाने जेलमा परेका हुन् । त्रिभुवन विश्व विद्यालयमा अध्ययन गर्ने उनले फोनबाट मनुषीलाई बारम्बार ‘प्रपोज’ गरेका थिए । हैरान भएर मनुषीले प्रहरीलाई मौखिक उजुरी समेत दिएकी थिईन् ।

चिन्नु न जान्नुको मान्छेले टेलिफोनबाट प्रस्ताव राख्दा पहिले केहिदिन पन्छाएपनि बारम्बारको प्रस्तावका कारण बाध्य भएर प्रहरी गुहारेको स्रोतले बताएको छ । महानगरीय प्रहरी परिसरबाट खटिएको टोलीले उनलाई पक्राउ गरि सार्वजनिक मुद्धा अन्तगत कारबाही चलाएको खबर आजको सौर्य दैनिकले छापेको छ । उनलाई थप अनुसन्धान गर्ने भन्दै प्रहरीले जिल्ला प्रशासन कार्यालयबाट दुईपटक म्याद थप गरिसकेको छ ।

प्रहरीले दिएको जानकारी अनुसार मनुषीले मौखिक उजुरीमात्र गरेकी थिईन भने लिखित उजुरी उनका हितैषी अञ्जनाले गरेकी थिईन् । अञ्जनाकै उजुरीका आधारमा न्यौपाने विरुद्ध कारबाही अघि बढाएको प्रहरीले जनाएको छ ।
अन्लाईन खबर डट कम