काठमाडौं, १५ कार्तिक । काठमाडौको क्षेत्र नम्वर ४ अन्तर्गत महाँकाल गाबिसमा सञ्चालित नेपाली काँग्रेसका उम्मेदवार गगन थापाको चुनावी प्रचार प्रसार अन्तर्गतको घरदैलो कार्यक्रममा नीर शाह लगायतका कलाकारहरु उपस्थित भई थापाको उम्मेदवारी प्रति ऐक्यबद्धता जनाएका छन ।

नीर शाहका अतिरिक्त सुरेश अधिकारी, महेश खड्का, लोकराज अधिकारी, विपीन किरण, छविराज अधिकारी, हेमन्त बुढाथोकी, सुदीप रेग्मी लगायत अन्य कलाकारहरु पनि उपस्थित थिए । उनिहरुले उम्मेदवार  गगन थापासँगै सो क्षेत्रका घर घरमा पुगी थापालाई मत हाल्न स्थानीय मतदाताहरुलाई आग्रह पनि गरेका थिए ।

आजै उम्मेदवार गगन थापा र क्षेत्र नं ४ मा बसोबास गर्ने  शेर्पा समुदायका मतदाताबीच एक अन्तर्क्रिया कार्यक्रम पनि आयोजना गरिएको थियो ।

आजको घरदैलो कार्यक्रम महाँकाल गाविसको मण्डिखाटारबाट बिहान सात बजे सुरु भई दिनभर सोही गाविसमा सञ्चालन भएको थियो । यस घरदैलो कार्यक्रममा स्थानीय मतदाता, नेपाली काँग्रेसका कार्यकर्ता तथा शुभेच्छुकहरुको उपस्थिति थियो ।

कार्तिक १६ गतेको चुनावी प्रचार प्रसारको कार्यक्रम अन्तर्गत कपन गाविसको वडा नं १ बाट बिहान सवा सात बजे घरदैलो  सुरु गरी दिनभर घरदैलो तथा स्थानीय मतदाताहरुसँग भेटघाट तथा अन्तरक्रिया  गर्ने कार्यक्रम रहेको नेपाली काँग्रेस क्षेत्र नम्वर चारका क्षेत्रीय सभापति न्हुच्छेनारायण श्रेष्ठले जानकारी दिनुभयो।