कमल थापा
मंगलबारदेखि सुरु भएको प्रवेशिका परीक्षा दिइरहेकी एक परीक्षार्थी परीक्षा हलमै सुत्केरी भएकी छिन्। पूर्वी रुकुमको तकसेरा केन्द्रबाट परीक्षामा सहभागी छात्रा रेखा घर्तीले परीक्षा दिँदा दिँदै छोरा जन्माएकी जिल्ला प्रहरी प्रमुख डिएपी किसनसिंह थापाले जानकारी दिए।
बिहान ७:३० बजेदेखि सञ्चालनमा भएको परीक्षामा सहभागी रेखालाई प्रश्न पत्र लिनेवित्तिकै सुत्केरी ब्याथा लागेको थियो। सुत्केरी ब्यथा लागेको आधा घण्टामै उनले छोरा पाएकी हुन। परीक्षा हलमै सुत्केरी भएकी रेखाले ८ वजेबाट पुनः परीक्षा दिएकी छिन्। परीक्षा हलमै सुत्केरी भएकी छात्रा रेखा घर्तीलाई एक घण्टा समय थपिदिएको परीक्षा समितिका अध्यक्ष समेत रहेका प्रमुख जिल्ला अधिकारी कृष्णप्रसाद अधिकारीले जानकारी दिए। उनको र नवजात शिशुको स्वास्थ्य राम्रो रहेको बताइएको छ। परीक्षा हलमै जन्मेको छोराको नाम प्रवेश राखिएको छ।

रुकुम जिल्लाका विभिन्न १८ वटा परिक्षा केन्द्रमा परीक्षा सञ्चालन भइरहेको छ। विभिन्न केन्द्रबाट ५ हजार ९६ जना विद्यार्थीहरु परीक्षामा सहभागी भएको जिल्ला शिक्षा कार्यालय रुकुमले जनाएको छ। जसमा २ जना कैदीले एसएलसी परीक्षा दिइरहेका छन्। कैदी बन्दीहरु पूर्णवहादुर ओली र विशाल रावलले जिल्ला कारागारमै परीक्षा दिइरहेका छन्। ओली कर्तब्य ज्यान र रावल आगो लगाएको मुद्दामा जेल परेका हुन्।

रुकुममै अर्की परीक्षार्थीले छोरी जन्माइन्

एसएलसी परीक्षामा सहभागी थप अर्की छात्राले परीक्षा हलमै छोरी जन्माएकी छिन्। पूर्वी रुकुमको प्वाङ स्थित नायगाड परीक्षा केन्द्रबाट परीक्षामा सहभागी छात्रा कविता विकले परीक्षा हलमै छोरी जन्माएकी हुन्। परीक्षा सुरु भएको  १ घण्टापछि छोरी जन्मेकाले एक घण्टाको समय थप गरिएको थियो।
यो सहित रुकुममा मात्रै परीक्षा हलमा सुत्केरी हुने छात्रा २ पुगेका छन्।

शिक्षक र परीक्षार्थी निष्काशित
यसैबीच परीक्षा हलमा अमर्यादित ब्यवहार देखाएको भन्दै एक परीक्षा गार्ड र परीक्षार्थी निष्काशनमा परेका छन्। जिल्लाको नुवाकोट केन्द्रबाट परीक्षा गार्ड शिक्षक खम्वु ओली र परीक्षार्थी गणेश ओलीलाई निष्काशन गरिएको छ। शिक्षकलाई परीक्षामा चिट चोराएको आरोपमा निष्काशन गरिएको हो। त्यसै गरि विद्यार्थीलाई चिट चोर्दा निष्काशित गरिएको हो।

नागरिक दैनिकबाट